የአክሰስ ሪል ኤስቴት ቤት ገዢዎች ማኅበር ተቋቁሞ የምዝበባ ምስክር ወረቀቱን ጥቅምት 2 ቀን 2013 ዓ.ም. ተረክቧል።

ማኀበበሩ ከመቋቋሙ በፊት የነበረው ሁኔታ

አክሰስ ሪል ስቴት አክሲዮን ማህበር ከቤት ገዥዎች ጋር ባደረገው ስምምነት መሠረት የገባውን ቃል ሳይፈጽም ሲቀርና የኩባንያው ሥራ አስኬያጅ ከአገር ከወጡ በኋላ የቀድሞው ጠቅላይ ሚኒስትር አቶ ኃይለማርያም ደሳለኝ በሰጡት ትዕዛዝ መሠረት ከፍተኛ የመንግሥት ባለሥልጣናትን ያካተተ “አብይ ኮሚቴ" ተቋቁሟል። ይህ ኮሚቴ ችግሩን በማጥናት ተግባራዊ ሊሆኑ የሚችሉ የመፍትሄ ሃሳቦችን የማቅረብ ኃላፊነት ተሰጥቶ ነበር። ይሁን እንጂ ኮሚቴው ከቤት ገዢዎች ጋር አንድ ጊዜ ስብሰባ አድርጎ ኩባንያው እንዳልከሰረ ካረጋገጠ በኋላ ሌላ ስብሰባ ለማድረግ ለቤት ገዥዎች የገባውን ቃል ሳያከብር እራሱን እንዳፈረሰ አንዳንድ የቤት ገዢዎች ተረዱ።

ከዚያም ከቤት ገዢዎች ተወካዮች ኮሚቴ መካከል አንዳንዶቹ ራሳቸውን “አብይ ኮሚቴ" ብለው ከፈረጁ በኋላ በመንግስት የተቋቋመው ከፍተኛ ኮሚቴ ሥራውን ጨርሶ መፍረሱን ላልጠረጠሩ ቤት ገዥዎ ኮሚቴው ያለ በማስመሰል ውዥንብር መፍጠር ጀመሩ። በቀጣይም ቤት ገዥዎች በራሳቸው ቤት ለመገንባት ተስማምተዋል እና መሬቱ እንዲሰጣቸው በማለት መንቀሳቀስ ጀመሩ። እውነታው ግን የቤት ገዢዎችን ሰብስቦ መሬቱ ይሰጠንና ቤታችንን ራሳችን እንሠራለን ማለት አለማለታቸውን የጠየቃቸው ወገን አልነበረም።

የቤት ገዢዎች ተወካዮች ኮሚቴ የሁሉንም ቤት ገዢዎች ጥቅም ያስጠብቃል ተብሎ ይጠበቅ ነበር። ነገር ግን ኋላ ላይ ግልፅ እየሆነ እንደመጣው ከቤት ገዢዎች ጥቅም ጋር ተፃራሪ የሆነ ነገር በማራመድ ላይ መሆኑ ታወቀ። ይህንን ተከትሎም እራሱን “እውነተኞች ቤት ገዢዎች" እያለ የሚጠራው የቤት ገዢዎች ቡድን ብቅ አለ። ይህ ቡድን ራሱን “አብይ ኮሚቴ" እያለ የሚጠራውን ቡድን እንቅስቃሴ በመቃወም እንዲሁም የመልዕክት መላኪያ ዝርዝሮችን ፈጥሮም የቤት ገዢዎችን ማነጋገር ጀመረ።

በመጀመሪያ ከ1,500 በላይ የቤት ገዢዎችን በኢሜይል መልዕክት በኩል ለማነጋገር የተሞከረ ቢሆንም ትክክለኛ ወይም ተመራጭ መንገድ አልነበረም። ስለዚህ፣ የኢንተርኔት ቡድን በመፍጠርና ሁሉም የታወቁ የኢሜል አድራሻዎች ያላቸው የቤት ገዢዎች የኢንተርኔት ቡድኑን እንዲቀላቀሉ ግብዣ ተላከ። ለመጀመሪያው ግብዣ ምላሽ ላልሰጡ ቤት ገዢዎች ሌላ ሁለት ተጨማሪ ግብዣ ተልኳል። በዚህ መንገድ ይህ አዲስ ቡድን “አብይ ኮሚቴ” እየተባለ የሚጠራው ኮሚቴ በቤት ገዢዎች ላይ የጫነውን የመረጃ ሞኖፖሊ አፍርሷል። አሁን፣ የቤት ገዢዎች፣ የትም ሀገር ቢኖሩ፣ ከሌሎች የቤት ገዢዎች ጋር ሃሳብ መለዋወጥ ይችላሉ።

የቤት ገዢዎች ኢንተርኔት ቡድኑ የቤት ገዢዎች ብዙ ጥሩ ሃሳቦችን እንዲለዋወጡ ያስቻለ ቢሆንም ችግሩ ጥሩ፡ ጥሩ ሃሳቦችን ተከታትሎ መሬት ላይ ወርደው ወደ ተግባር እንዲገቡ የሚያደርግ አካል ያለመኖሩ ነበር። ስለዚህ አንዳንድ የቤት ገዢዎች “ማህበር” እንዲቋቋም ባቀረቡት ሃሳብ መሠረት የአክሰስ ሪል ኤስቴት ቤት ገዢዎች ማኅበር ሊቋቋም ችሏል።